Kuna wakati kunaweza kuwepo tofauti kati ya kukiri kwa midomo yetu na mwenendo wetu; kati ya kusema kitu kizuri sana na kuishi kile tulichokisema. Je, tunalielewa hilo… au pengine bado hatujalielewa kwa undani?

Zamani, nilipokuwa nafanya kazi ya ushauri katika teknolojia, jukumu langu kubwa lilikuwa kukagua mahitaji ya wateja na kuwashawishi viongozi wao wakubaliane na mapendekezo yetu ya mifumo ya utendaji. Nilikuwa mzoefu katika maongezi, kwa hiyo haikuwa ngumu kwangu kuwashawishi watu wakubaliane na ushauri wa kampuni yetu.

Lakini mambo yalibadilika nilipoitwa mahakamani kama shahidi kwenye kesi iliyohusu teknolojia. Kule, kushawishi pekee hakutosha. Ilibidi nilete uthibitisho wa kusapoti maamuzi yangu. Ndipo nikagundua: kuthibitisha jambo ni vigumu sana kuliko kumshawishi mtu kuliamini.

Na hasa hilo ndilo Yohana Mbatizaji anazungumzia katika maandiko haya:

Mathayo 3:7-8
Hata alipoona wengi miongoni mwa Mafarisayo na Masadukayo wakiujia ubatizo wake, aliwaambia, Enyi wazao wa nyoka, ni nani aliyewaonya ninyi kuikimbia hasira itakayokuja? Basi zaeni matunda yapasayo toba.

Tusibaki na maneno matupu. Toba ya kweli si kujutia tu—bali ni kuonyesha mabadiliko ya mwenendo. Kutubu ni kugeuka: kuacha dhambi na kumgeukia Mungu.

Kwa hiyo, Yohana alikuwa akisema hivi: kama kweli umetubu, uthibitisho uko wapi? “Tunda” la toba ni mabadiliko yanayoonekana katika tabia na maisha yako, kwa sababu moyo wako umemgeukia Mungu.

Toba si hisia pekee—ni uamuzi unaoleta mabadiliko halisi. Hakuna maana ya kujutia dhambi kama bado hujaacha kuifanya.

Hili ndilo Neno la Mungu safi na lenye afya kwa ajili yako leo.