Ons het almal van tyd tot tyd ‘n woord van bemoediging nodig. Dis ‘n feit. En nou wil ek graag iets sê om jou te bemoediging.

Ons voel soms asof daar ‘n swaar wolk oor ons lewens hang. Dinge gaan net nie soos hulle veronderstel is om te gaan nie. As God inderdaad God is, dan is dít die tyd dat Hy ons te hulp moet snel – juis wanneer ons onder daardie wolk verkeer.

Tweeduisend jaar gelede het die apostel Petrus briewe aan vervolgde Christene geskryf. Hierdie Christene is tydens Caesar se tuinpartytjies met teer bedek en as fakkels aan die brand gesteek. Glo vir my, dit het ‘n groot wolk veroorsaak. Hy open sy brief as volg:

1 Petrus 1:2 Soos God die Vader dit vooraf bestem het, het Hy julle uitverkies en deur die Gees afgesonder om aan Hom gehoorsaam te wees en besprinkel te word met die bloed van Jesus Christus. Mag daar vir julle genade en vrede in oorvloed wees!

‘n Meer letterlike vertaling van die laaste deel kan so klink: “Mag die genade en die vrede in oorvloed joune wees.” Stop net en dink ‘n oomblik daaraan. Dit is so diep en betekenisvol. God praat deur Petrus se brief met hierdie mense. Hy reik uit na hulle waar hulle onder ‘n geweldige wolk verkeer. Hy herinner hulle daaraan dat hulle, lank gelede al as deel van God se groot en magtige raadsplan, bestem is om deur Hom gered te word.

En dan, onder daardie wolk, deur daardie beproewings en vervolging seën Hy hulle:

“Mag daar vir julle genade en vrede in oorvloed wees!”

Ek bid dat hierdie kragtige seën jou sal bemoedig; watter wolk daar ook al van tyd tot tyd oor jou mag hang. Weet dit –  God het ‘n plan vir jou lewe – Hy bied jou sy genade en vrede in oorvloed.

Dit is God se Woord. Vars … vir jou … vandag.